15-sentabr kuni Rossiya prezidenti Vladimir Putin va Xitoy Xalq Respublikasi (XXR) raisi Si Szinpin Samarqandda Shanxay hamkorlik tashkiloti (SHHT) sammiti doirasida uchrashdi, deb yozadi Meduza.
Uchrashuv boshida Putin Xitoy vakillariga “Ukraina inqirozi” bo‘yicha masalalarni ochiqlashga va’da berdi.
“Aytish kerakki, bir qutbli dunyoni yuzaga keltirishga urinishlar so‘nggi vaqtlarda mutlaqo xunuk qiyofa kasb etdi va sayyoradagi davlatlarning aksariyati uchun nomaqbul bo‘lib qoldi. Xitoylik do‘stlarimizning Ukraina inqirozi yuzasidan muvozanatlashgan pozitsiyasini yuqori baholaymiz, sizning bu boradagi savollaringiz va xavotiringizni tushunamiz, va bugungi uchrashuv davomida, albatta, ushbu masala bo‘yicha pozitsiyamizni ochiqlab o‘taman, garchi biz bu haqda avval ham gaplashgan bo‘lsak-da”, — dedi Putin.
Shuningdek, u Rossiya “yagona Xitoy” tamoyiliga qat’iyan rioya qilishini va AQSHning Tayvandagi “provokatsiyalari va gumashtalari”ni qoralashini aytdi.
Si Szinpin, o‘z navbatida, kirish gapida tomonlar pandemiya ta’sirini yengib o‘tib, “eng muhim strategik muloqot”ni davom ettirishga muvaffaq bo‘lganini ta’kidladi. U Rossiya va Xitoyni dunyoga “biroz ko‘proq barqarorlik” taqdim etayotgan yetakchi dunyo mamlakatlari deb atadi.
12-sentabr kuni Si Szinpin koronavirus pandemiyasi boshlanganidan buyon birinchi marta Xitoydan tashqariga chiqdi. SHHT sammiti oldidan XXR yetakchisi Qozog‘istonga tashrif buyurdi.
Avvalroq Rossiya prezidenti Vladimir Putin va Xitoy Xalq Respublikasi raisi Si Szinpin noyabr oyida Balida bo‘lib o‘tadigan G20 sammitida shaxsan ishtirok etishni rejalashtirayotgani haqida Indoneziya prezidenti Joko Vidodo ma’lum qilgandi.
Keyinroq ular G20 sammitini kutmasdan, 16-sentabr kuni Shanxay hamkorlik tashkilotining O‘zbekistondagi sammitida uchrashuv o‘tkazishi xabar berildi.
Xitoylik mansabdorlar Samarqandga safar Si Szinpin G‘arbning Xitoyni tiyib turish bo‘yicha sa’y-harakatlariga qarshi turish uchun AQSH bilan ittifoqdosh bo‘lmagan mamlakatlar bilan xavfsizlik sohasida yaqin aloqalarni rivojlantirish maqsadiga urg‘u berishini qayd etgandi.
Izoh (0)